Во интервју за МИА, главниот и одговорен уредник на емисијата Фчерашни новости, Бранко Огњановски, истакна дека во петата сезона која како што најави ќе започне во недела, 27 октомври, во 19:30 часот на телевизијата Канал 5, како и минатата сезона нема да поштедат никого.

Тој посочи дека овој пат во фокусот на Фчерашни ќе биде корупцијата и ќе се третираат сите проблеми во секојдневното живеење, но сепак најмногу ќе се разобличува корупцијата, како „рана што одамна ни се гледа“.

Огњановски за МИА открива дека во петата сезона ќе има и нови ликови, но ќе има и еден посебен дел посветен на новинарството и многу други новости за кои не открива многу затоа што, како што вели, останува на гледачите да ги видат.

Истакна дека темите кои ќе ги работат Фчерашни ќе бидат оние што и класичните вести ги обработуваат, односно секојдневието со кое сите сме опкружени.

Посебен фокус ќе имаме на корупцијата и тој дел од општеството. Тоа ни е, да речеме, некоја рана што одамна ни се гледа. Меѓутоа, сите теми ќе бидат застапени. И нема да штедиме никого. Секако, одговорни секогаш за состојбите се луѓето од власта, луѓето што се одговорни за политиките што ги креираат, но и опозицијата, практично секојдневното живеење. Сите ќе бидат во фокусот вели Огњановски за МИА.