Министерот за здравство Венко Филипче вчера потврди дека министерот Оливер Спасовски од синоќа е хоспитализиран на Инфективната клиника, посочувајќи дека неговата состојба е стабилна.

Министерот Спасовски од синоќа е хоспитализиран на Инфективната клиника, поради висока температура. Неговата состојба е стабилна, истакна Филипче.

Спасовски позитивен резултат на тестот на коронавирус доби пред два дена.

Тој објави дека има благи симптоми и дека е во домашна изолација.

На Инфективната клиника хоспитализиран е и генералниот секретар на Владата, Драги Рашковски, кој исто така е заразен со коронавирус.

„Почитувани, би сакал да ве информирам дека и покрај строгото почитување на мерките коишто ги преземам за моја лична и заштита на луѓето околу мене од почетокот на пандемијата, вечерва добив позитивен резултат за Ковид 19. Клиничката слика ми е добра, со благи симптоми и веќе сум во домашна самоизолација. Чувајте се“ напиша министерот.

Спасовски учествуваше во засадувањето 75 млади садници дрвја во околината на Велешкото Езеро – „Младост“, што беше зафатена од пожар пред повеќе од една година заедно со премиерот Зоран Заев, министерот за животна средина и просторно планирање, Насер Нуредини, министерот за земјоделство, шумарство и водостопанство, Арјанит Хоџа и постојаната координаторка на Обединетите нации, Росана Дуџак, какои со високите претставници на агенциите на ОН во нашата земја.