Грчкиот премиер, Кирјакос Мицотакис порача дека од 4 мај во земјата постепено ќе се започне со ублажување на рестриктивните мерки така што ќе почнат со работа помалите трговски продавници, фризерските и козметичките салони, пишува DW.

„Бидејќи помина првиот бран од вирусот, сега сме подготвени да преминеме на втората фаза, а тоа е постепено ублажување на рестриктивните мерки“, изјави Мицотакис во телевизиско обраќање.

Грчкиот премиер рече дека на 4 мај ќе бидат укинати рестрикциите за движење на граѓаните, а одделни продавници и јавни служби повторно ќе бидат отворени.

Тој додаде дека движењето на граѓаните ќе биде ограничено на зоната во која живеат.

Но, водете сметка, тоа не е крај на една лоша авантура, туку нејзино продолжување. Ќе излеземе од домовите, но остануваме одговорни“, рече Мицотакис повторувајќи оти приоритет останува здравјето на граѓаните.