Вицепремиерот за европски прашања, Бујар Османи во интервју, најави можност за селективна амнестија за учесници во немилите настани во Собранието минатата година.

Имено Османи за Радио слободна Европа во дел од прашањата за немилите настани во Собранието минатата година, најави можност за амнестија.

На прашањето колку формирањето на тело за национално помирување е надвор од очекувањата на меѓународната заедница и Европската комисија за целосна одговорност за инцидентот, Османи изјави.

Помирувањето не значи помилување, не значи амнестија како што беше сфатено. Обврска на премиерот е да ја покрене, да ја лансира идејата дека државата има потреба од помирување и ајде да ги видиме примерите, какви примери има во светот, коишто можат да бидат добра пракса, а ние можеме да ја имплементираме. Но, реков дека во тој процес на помирување не смее на ниеден начин да се промовира принципот на неказнивост на тие што се директно вклучени во насилство или организатори на насилство и тоа се тие црвени линии кои ги кажуваме во тој процес. Но доколку има добри практики во светот за помирување за настани од сличен карактер, дајте да ги разгледаме, државата сега има потреба од тоа, но никако тоа нема да го направиме надвор од линиите што ги поставува ЕУ.

Османи се осврна и на т.н. одметнати пратеници кои сега власта ги промовира во уставобранители од терористи на уставниот поредок.

Нека се разговара, доколку има такви моменти кои се колатерална штета на една погрешна кауза, а за тоа биле несвесни во моментот кога тоа се случило, а има таква пракса во светот, да го разгледаме и да видиме и се разбира дека тоа ќе биде во консултација на нашите меѓународни партнери.

На прашањето дали лично смета дека пратениците обвинети за случајот се колатерална штета, Османи изјави.

Не сум јас тој што треба да кажам, бидејќи не ги знам деталите од случувањата, меѓутоа претпоставувам дека таму имало луѓе кои што биле колатерална штета и не биле свесни ќе следи еден таков процес и едноставно се нашле таму. Доколку има простор за такво нешто мислам дека треба да се разговара.