Вицепремиерот Бујар Османи, пред голем број амбасадори, претставници на меѓународни организации, градоначалници и други гости во шарпланинската област Шипковички бачила рече дека со своите убавини и богатства, Шар Планина е едно од најзначајните подрачја за зачувување на природата не само во Македонија, туку и на регионално и на Европско ниво.

Процесот на прогласувањето на Шар Планина за национален парк финишира заедно со процесот на почнување на преговори за членство во Европската унија, рече вицепремиерот Бујар Османи.

Османи истакна дела во овој сегмент, еден од условите што Македонија треба да ги исполни како идна членка на ЕУ е да ги задоволи пропишаните европски регулативи во врска со зачувување на биодиверзитетот, односно обезбедување степен на заштита на барем 12 проценти од вкупната своја територија. 

Заедно со општината и со амбасадорите ја промовираме потребата од прогласување на Шара за национален парк. Работите привршуваат и во наредните месеци очекуваме тоа да се реализира и драго ми е што таа динамика коинцидира со процесот на започнување на преговори со што даваме две пораки дека политички созреваме да станеме дел од Унијата, а и дел од практичните прашања како што е животната средина сме подготвени да ги живееме европски. Република Македонија има девет проценти заштита во смисла на биодиверизитетот, а со прогласување на Шар Планина, тој процент бил се зголемил на 12 проценти со што се доближуваме на европските стандарди за заштитено подрачје, изјави вицепремиерот за европски прашања Бујар Османи.

Тука сме во сличен контекст, да употребам стручен термин – во насока на промоција на „зачувувањето на биодиверзитетот“. Во овој сегмент, еден од условите што Македонија треба да ги исполни како идна членка на ЕУ е да ги задоволи пропишаните европски регулативи во врска со зачувување на биодиверзитетот, односно обезбедување степен на заштита на барем 12 проценти од вкупната своја територија. Но, дозволете да испратам друга порака. Ајде за оваа идеја, за оваа вредност или стандард да одиме чекор понатаму. Ајде да го заштитиме биодиверзитетот на уште поголеми пространства, и да со тоа да бидеме убавиот дел од Европа – истакна Османи.

Градоначалничката на Тетово, Теута Арифи, рече дека важно е да се прогласи Шара за национален парк, да се зачуваат природните богатства и да се развие еко туризам кој ќе биде додадена вредност.