Оштетени 525 куќи и 3.100 станови, е билансот во Тирана по катастрофалниот земјотрес кој минатата недела ја погоди Албанија и по што починаа над 50 лица.

Бледи Чучи, министерот за земјоделство и кординатор за менаџирање со кризи во Албанија на денешната седма по ред вонредна седница на албанската Влада, истакна дека сите оние кои во земјотресот останаа без покрив над глава се сместени во хотел и се на безбедно.

Со денешната седница раководеше вицепремиерот Ерион Браче, поради отсуство на премиерот  Еди Рама, кој е во Лондон на Самитот на НАТО и соопшти дека гоелма е бројката на оштетени објекти и лица сместени во шатори и хотели.

Министерот за земјоделство и кординатор за менаџирање со кризи, Бледи Чучи, рече дека во Тирана се оштетени 525 куќи и 3.100 станови.

– Што се однесува за сместувањето на луѓето погодени од земјотресот, 4.000 лица се сместени во хотели, 2.054 во сали, додека 26 се уште се во болници. 6.500 луѓе се под шатори додека 390 во социјални станови. Големи оштетувања има кај 36 учлишни објекти од нив четири во Тирана. 12 сопственици во Драч, изразија готовност сами да ги покријат штетите од земјотресот -рече Чучи.

Чучи на седницата изрази благодарност до сите оние кои покажаа солидарност во овие тешки моменти за Албанија и истакна дека продолжува да пристигнува помош од Турција, Косово, Црна Гора, Македонија, Хрватска и други земји.

Вчера на владината седница од страна на пратениците во македонското собрание беше прифатено да се додели хуманитарна помош на Република Албанија, што се состои од 3.716 ќебиња, за потребите на настраданите во земјотресот од 26.11.2019 година кој го погоди градот Драч и околината.

Како што соопшти владиниот Сектор за односи со јавноста, владата денеска ја одобрила и постапката за преговори за потпишување Спогодба меѓу Владата на Република Македонија и Владата на Република Србија за отворање нов заеднички Граничен премин „Лојане-Миратовац“.