Косовскиот премиер Рамуш Харадинај отпатува во официјална посета на Соединетите Американски Држави.

Харадинај преку социјалните мрежи нагласи дека во фокусот на неговите активности во Њујорк ќе биде јакнењето на меѓународната позиција на Косово.

Во Њујорк ќе остварам билатерални средби со колеги и меѓународни делегации кои учествуваат на Генералното собрание на Обединетите Нации, со акцент на презентацијата на достигнувањата на Косово, зачленувањето на земјата во меѓународните организации, привлекување директни инвестиции во земјата и други теми кои се во интерес за Косово.

Покрај тоа, во правец на јакнењето на партнерството со САД, ќе остварам средби со сенатори, конгресмени и влијателни личности во Вашингтон. – напиша Харадинај, порачувајќи дека “евроатлантскиот пат на земјата е неповратен”.

Од приштинскиот аеродром за САД заедно полетаа и Харадинај и претседателот на Косово Хашим Тачи.

Како што соопштија од неговиот кабинет, Тачи заедно со сопругата ќе бидат дел од приемот кој во ОН ќе го приреди претседателот на САД Доналд Трамп и првата дама Меланија Трамп.

Косовската делегација, составена од претседателот, премиерот и министерот за надворешни работи Беџет Пацоли, во Њујорк ќе оствари многубројни билатерални средби со шефовите на државите.