Патник на летот Брисел-Скопје на авиокомпанијата „Виз Ер“ пушел цигара во авионот, по што бил приведен од полицијата на Скопскиот аеродром, потврдија од МВР, објави Сакамдакажам.

Патникот запалил цигара во тоалетот на авионот, по што екипажот го пријавил случајот на аеродромот и побарал асистенција од полиција.

Според правилата на авиокомпанијата, пушењето во авион, вклучувајќи класични и електронски цигари, е строго забрането без оглед на должината на летот.

Како што стои на сајтот на Виз Ер, последиците за непочитување на оваа забрана се парична казна до 3.000 евра и апсење од локалната полиција.

Патници кои редовно летаат на линијата Скопје-Брисел велат дека и покрај строгите казни, се случувало и претходно во авионот да не се почитува забраната за пушење.