Денеска по состанокот на Советот за бебзедност, одговарајќи на новинарско прашање, претседателот на државата Стево Пендаровски посочи дека Гоце Делчев е македонски револуционер и треба да ни биде чест доколку некој друг народ го чувствува како свој херој, во овој случај Бугарија која постојано тврди дека тој е бугарин.

-Тој е македонски револуционер кој придонел многу за нас. Но, за оние кои тврдат дека тој се борел за Бугарија, тоа за мене не е спорно. Секој може да чувствува некого како свој херој. Нека го чествува кој сака, тоа може само на нас Македонците да ни прави полем мерак. Исто е и со Мајка Тереза, нема да се расправаме дали е Албанка или Македонка, рече Пендаровски во своето обраќање.

Инаку на состанокот свикан од претседателот Пендаровски, присуствуваа претседателот на Собранието Талат Џафери, премиерот Зоран Заев, министрите за одбрана, за внатрешни работи и за надворешни работи Радмила Шекеринска, Оливер Спасовски и Бујар Османи.

Присутни беа и советниците и универзитетски професори Гоце Трајановски, Ненад Марковиќ и Ветон Љатифи.

На состанокот покрај постојаните членови на покана на претседателот Пендаровски присуствуваа и директорите на Агенцијата за разузнавање Еролд Муслиу, на Агенцијата за национална безбедност Виктор Димовски и на Оперативно техничката агенција Зоран Ангеловски, како и началникот на ГШ на АРМ генерал-потполковник Васко Ѓурчиновски.

Тема на состанокот беше политичко безбедносната ситуација во земјата по пристапување во членство во НАТО.