Претседателот Стево Пендаровски засади садници јапонски кедар на опожарената површина околу велешкото езеро Младост.

Она што природата го негувала повеќе од 30 години, изгоре за неколку дена. Сега, сите ние треба да и возвратиме на природата со иста мера и поскоро да ја надоместиме штетата. Денеска симболично засадивме неколку садници, а припадниците на армијата веќе го расчистуваат теренот. Да помогнеме „белите дробови“ на Велес повторно да придонесуваат за здрава животна средина, напиша на социјалните мрежи претседателот Стево Пендаровски.

Денес беа засадени 30-ина садници кои ги обезбеди локалната власт додека големото пошумување ќе се случи на 9 ноември, Денот на Општина Велес. Денеска на терен беа и војската и вработени во ЈКП „Дервен“, кои ги сечеа изгорените дрвја.

„Запрепастен сум од ова што го видов на самото место. Едно се новинарските извештаи, снимки кои ги гледаме дома, седејќи пред телевизорот. 4.509 уништени хектари за само едно пладне и попладне е многу. Јас како врховен командант на армијата дадов согласност да се користат и авионите, хеликоптерите и војската во гаснењето на огнот. Ве уверувам дека армиските ресурси беа употребувани до техничкиот максимум, не само во Велешко, туку и на сите пожари во земјава летоска“, изјави Пендаровски.

Денеска во Велес претседателот Пендаровски ги посети и пожарникарите кој го информирале дека работат во неповолни услови.

Храбрите велешки пожарникари денеска ме информираа дека за жал работат во неповолни услови. Од нивната подготвеност зависи нашето општество, а ракуваат со возила постари и од 50 години. Во недостиг на радиостаници, при интервенциите се координираат преку мобилен телефон. #ЛицевЛице со командирот Лепидовски и со пожарникарите се согласивме дека неопходна е итна инвестиција во човечки капитал и во нова опрема.