Претседателот на државата Стево Пендаровски вчера во интервју за емисијата Само вистина на телевизија Канал 5 на прашањето дали е можна ревизија на Преспанскиот договор, вели дека е можно, но не е реално.

– Објективно во секоја идна Влада, како и досега, имате значаен албански партнер, на кои да не се лажеме, името Македонија, идентитетот и јазикот македонски, не им значи бидејќи тие не се Македонци и тие би сакале да бидат во обединета Европа. За нив тоа е примарна политичка цел, вели Пендаровски.

Тој прокоментира за трговската ознака, и вели дека ние треба да бидеме многу понастојчиви и политички, не само правно. Потсетува дека за тоа е формиран тим од експерти од двете страни, кој треба во рок од три години да донесе решение за ознаките за се што се извезува од нашите две држави во светот.

– Се додека тоа не се направи, вие не можете да го присвојувате тоа име, истакна претседателот Пендаровски.

Пендаровски рече дека новото име на државата го користи само во официјални прилики.

Во емисијата претседателот говореше и за судството во Македонија и посочи дека нема да има голем ефект доколку се сменат одредени судии и обвинители. Тој верува дека проблемот е далеку поголем.

Пендаровски не сакаше да го коментира случајот „Рекет“ бидејќи како што посочи процесот е во тек, само ја прокоментира презентацијата на снимките во случајот „Рекет“  од страна на обвинителката Вилма Русковска.

Обвинителката вели Јанева се упатила во правец кон резиденцијата на претседателот. Тоа е средината на август, јас тогаш таму не сум ни живеел. Тоа не е коректно. Тоа се сензивитни информации и не можете така непрецизно да шпекулирате, да велите се движи во правец таму и таму. Може да се движи и кон крстот на Водно, вели Пендаровски.