Нема најави од бугарскиот државен врв дека ќе го блокираат доделувањето датум за отпочнување преговори со ЕУ, изјави претседателот Стево Пендаровски, одговорајќи на новинарско прашање на денешната зедничка прес-конференција со црногорскиот претседател Мило Ѓукановиќ во вила „Водно“.

Според него, бугарскиот државен врв на одржаниот состанок во понеделникот најави поставување барања кои би биле врамени како нивни бенчмаркови во понатамошниот тек на преговорите.

– Нема никаква најава ниту од релевантен фактор од соседна Бугарија, дали е тоа претседател, дали е Владата, надлежните министри, дека Бугарија сега ќе не блокира во средината на овој месец кога чекаме да добиеме датум за преговори, кога ја очекуваме европската одлука на 15 или на 17 октомври. Како понатаму, не само Бугарија, туку можеби и Грција низ понатамошната имплементација на Преспанскиот договор, ќе се однесува во текот на преговорите кои траат со години, во тој долг процес, ќе видиме. Допрва ќе прочитаме и чуеме тоа што го најавуваат како преговарачка рамка за ова прашање, но повторувам тоа е за понатамошниот период кога ќе почнеме да преговараме, се надеваме од почетокот на 2020 година, рече претседателот Пендаровски.

Тој додаде дека во оној момент кога ќе ја видиме преговарачката позиција ќе може да кажеме како ние ќе одговориме на тоа.

– Ние не можеме на хипотетска преговарачка рамка да антиципираме што може тие да бараат од нас. Таа е реалноста во ЕУ, тие што се внатре бараат или поставуваат услови за оние што се надвор. Тоа може да дојде и низ заедничката европска позиција. Секоја од земјите членки дава импут, тоа што мисли дека е нејзин национален интерес и тоа на крај нам ни се претставува како кандидат како позиција на ЕУ, рече Пендаровски

За потсетување, Бојо Борисов неодамна му се закани на премиерот Зоран Заев дека Бугарија ќе стави вето на преговорите на Македонија за ЕУ.

„Секој треба да пази што зборува, тоа си е на негова штета“- со тие зборови премиерот на Бугарија, Бојко Борисов ја коментира изјавата на неговиот колега Зоран Заев за македонскиот карактер на Илинденско-Преображенското востание.

„Ако го кажал тоа со умисла, или непремислено, пак е на негова штета. Затоа што кога ќе дојде до вратите на ЕУ и ние исто треба да дадеме наша согласност и ќе се потсетиме на овие работи. Мојот совет кон сите е да бидеме повнимателни.“- изјави Борисов.

Оваа реакција на Бојко Борисов доаѓа по интервјуто на Зоран Заев за телевизијата 1ТВ, од 4 август, каде македонскиот премиер кажа: „Илинденското востание е македонско, и ако некој граѓанин на Бугарија сака, нека си го празнува“.