Австриската полиција соопшти дека го испитува убиството на пет лица во ски-центарот Китзбуехел.

Тешкото убиство се случило во текот на ноќта, изјави портпарол на регионалната полиција во Тирол. Осомничениот убиец е уапсен, јави австриската новинска агенција АПА, повикувајќи се на полиција.

Медиумите објавија дека убиецот бил 25-годишен маж кој влегол во семејниот дом на неговата поранешна девојка и убил пет лица – младата жена и нејзиното ново момче, како и нејзините родители и братот.

Веднаш после убиството тој се предал на полицијата и признал дека ги убил.

Само во првите три недели од оваа година се случиле пет убиства во Австрија, од кои сите жртви се жени.

Како што пренесе српската новинска агенција „Танјуг“, лани во Австрија регистрирани се 78 убиства, што е рекорден број.
Убиствата ги извршиле 41 лице од Австрија и 37 странци. Меѓу убијците кај странците најголем дел се од Србија и Косово, чиишто граѓани извршиле по седум убиства.