Опозициската ВМРО ДПМНЕ подготвува смена на актуелниот лидер на партијата, Христијан Мицкоски, а на тоа кумува поранешниот претседател на партијата, Никола Груевски. Ова го тврди поранешен функционер во ВМРО-ДПМНЕ, Филип Петровски.

Според Петровски, за нов лидер на ВМРО-ДПМНЕ се подготвува Александар Николоски, потпретседател на оваа партија.

„Тука е спомнат Александар Николоски, кој што е новото милениче на Груевски, за кој што се зборува дека по абдицирањето на Мицкоски, треба да биде неговиот нов наследник, нели, со амин од Груевски, за тој да го задржи своето влијание во партијата. Моите информации говорат дека Николоски работи на создавање на коалиција, на создавање на медиуми, на прибирање на новинари и на влијателни луѓе кои тоа би го поддржале и егзекутирале. Тоа Мицкоски го знае и мислам дека е свесен дека не може да избега од тоа доколку промената се случи.“, рече Петровски.

Според Петровски, тоа е тотално неприфатливо за ВМРО-ДПМНЕ и ќе биде погубно, бидејќи како што вели, партијата е во многу лоша состојба сега.

ТВ21 контактираше и со потпретседателот Александар Николовски, кој во кратка изјава рече дека се работи за класична лага и манипулација.

Воедно, извори од владеачката партија по повод изјавата на Петровски велат дека не сакаат да ги коментираат внатрешните случувања во партијата, бидејќи како што велат, не сакаат да се мешаат во нивните работи.