Вчера, 22 Јули, во Градскиот Парк во Струмица, за прв пат во Македонија, се одржа Штафета на Еднаквоста под организација на Анче Туфекчиева, основач на здружението “Вера” за помош и поддршка на лица со даун синдром и други пречки во развој.

Пред самиот почеток на штафетата, Анче во својот поздравувачки говор, се обрати до присутните, споделувајќи го своето искуство и предизвиците со кои секојдневно се соочува како родител на дете со даунов синдром: ” Никој нема да ви каже дека е лесно, но секој ќе ви каже дека за одгледување на дете со посебни потреби, не треба посебно семејство. Нашите деца ги прават нашите семејства посебни. Заради нашите деца, научивме да бидеме учители, медицински сестри, доктори, спортисти, глумци, пеачи. Научивме дека не сакаме да ги променеме нашите деца за ништо на светот, но ќе го променеме светот за нив.”

Помеѓу пријавените учесници од Струмица и околните градови, беа и градоначалниците на Струмица, Коста Јаневски и Валандово, Перо Костадинов, Советниците на Струмица, Томе Лазаров и Радовиш, Ристо Спасов, поранешната Мис на Македонија и водителка, Сања Николиќ, пејачот Слаткар кој дојде специјално да го изненади и запознае неговиот најголем обожавател, 3 годишниот Максим од Радовиш, како и хуманитарката Мариа Дибиаџио која им донесе медали и подароци на сите деца учесници со посебни потреби.

15 деца со посебни потреби трчаа рамо до рамо со останатите учесници и ја предадоа штафетата која пристигна на целта во рацете на градоначалникот во Струмица. Господин Јаневски ги прочита пораките пред присутните: “Сите Сме Еднакви”, “Заедно Поместуваме Планини”, “Насмевката Е Убава На Секое Лице”.