По топлотниот бран кој ја зафати Македонија, следува големо невреме проследено со поројни врнежи, силен ветер како и грмежи. Невремето најпрво ќе го зафати северен Балкан поточно  Словенија, Хрватска и Босна и Херцеговина па потоа преку Србија, Црна Гора и Албанија ќе пристигне и кај нас.

Поради судирот на две воздушни маси (многу топлата од југ и свежата од север) локално процесите ќе бидат интензивни со пороен дожд, силен ветер, силни и чести електрични празнења и појава на град кој локално има услови да биде и крупен.

Според метеоролозите, во среда попладне кај нас се очекува намалување на температурите, дожд и грмежи со засилен ветер кои ќе се задржат и во текот на ноќта. И во четврток облачноста ќе се зголеми и локално ќе биде нестабилно со пороен дожд, грмежи и засилен ветер.

Температурите на воздухот пак до среда ќе бидат екстремно високи и ќе се искачуваат во интервалот од 35 до 42 степени додека пад на истите и освежување ќе имаме во среда навечер и во текот на ноќта кон четврток за веќе во четврток попријатно да биде и преку денот кога максималните дневни температури на воздухот ќе се искачуваат во интервалот од 27 до 36 степени, освежувањето особено ќе се почувствува во северната половина од државава.