Пратеникот од ВМРО-ДПМНЕ, Влатко Ѓорчев, кој престојува во Вашингтон за Молитвениот појадок во организација на американскиот претседател Доналд Трамп оствари средба со државниот секретар на САД, Мајк Помпео. Средбата на Ѓорчев со Помпео доаѓа по неговата кандидатура за претседател на државата кои ќе се одржат во Април-Мај оваа година, и само Ѓорчев и министерот Никола Димитров досега успеале да остварат средби со Мајк Помпео.

Изминативе денови Ѓорчев, како еден од претседателските кандидати на ВМРО-ДПМНЕ се сретна и со Сара Сандерс, портпаролка на Доналд Трамп, како и со американските сенатори Џејмс Инхоф (Републиканец) и Тим Кејн (Демократ). “За Македонија е важно да има отворени врати во Вашингтон. Секое пријателство и средба е можност да се кажат македонските аргументи. Македонија мора да гради силни сојузништва. На тој начин ги подобруваме позициите на Македонија“, напиша Влатко Ѓорчев на својот профил на Фејсбук.

Неколку актуелни политичари од Македонија се поканети на молитвениот појадок во Вашингтон, а меѓу нив и пратеникот Влатко Ѓорчев од парламентарната група на ВМРО-ДПМНЕ, потпретседателот на ВМРО-ДПМНЕ Александар Николоски, вице-премиерот Бујар Османи од редовите на ДУИ, пратеничката Фросина Ременски од СДСМ, како и градоначалникот на Гостивар, Арбен Таравари, како генерален секретар на Алијансата на Албанците. На молитвениот појадок е поканета и г-а Вилма Трајковска, вдовицата на загинатиот поранешен претседател на Македонија, Борис Трајковски.