Гордан Грлиќ Радман, хрватскиот министер за надворешни работи пред членовите на комисијата за надворешна политика на Европскиот Парламент рече дека Западен Балкан е врвен приоритет за хрватското претседателство и во тој контекст отворањето преговори со Македонија и Албанија имаат посебна важност за кредибилитетот на Европската Унија.

– Кредибилитетот на Европската Унија како светски играч треба да го положи тестот на успехот во нејзиното непосредно соседство изјави Радман пред членовите на комисијата за надворешна политика на Европскиот Парламент.Акцентот треба да се стави на стабилноста и безбедноста во непосредното соседство, отпорноста и реформските напори. ЕУ има добри причини да продолжи да се посветува на зајакнувањето на европскиот континент и да не дозволи ниеден регион во Европа да скршне од патот .

Тој пред европратениците истакна дека доколку Македонија и Албанија добијат датум за преговори за влез во ЕУ, тоа би било знак дека ЕУ има стратешки пристап кон нејзиното најблиско соседство.

Хрватска го прогласи проширувањето кон Западен Балкан како еден од нејзините врвни приоритети за време на нејзиното претседавање со ЕУ во првите шест месеци од оваа година. Во мај во Загреб ќе се одржи лидерски самит на земјите членки на ЕУ и државите од западниот Балкан.