Зоран Караџовски, претседателот на Судскиот совет денес беше повикан и денес се појави на распит во Основното јавно обвинителство за гонење на организиран криминал и корупција во Скопје. Караџовски е повикан за случајот со покачените плати на членовите на Судскиот совет. 

Во декември 2018 година членовите на Судскиот совет донесоа одлука да си ги зголемат нивните плати и платите на судиите за 35 отсто, со што нивните плати беа зголемени за 21.000 денари. Информацијата тогаш  ја објави Синдикатот на УПОЗ. 

Кривичната пријава беше најавен токму поради двете одлуки за исплата на додатоци на плата во висина од 35 проценти за членовите на Судскиот совет и за ретроактивна исплата на додатоци за плата за септември и октомври. 

Синдикатот и Здружението на судска администрација не се против исплатата на додатоци на плата за судиите бидејќи тоа им следува законски, но не се согласуваат со одлуката за ректроактивна исплата.

Обвинителството испитува основаноста на донесените одлуки и ќе се истражува евентуална кривична одговорност за злоупотреба на службената положба и овластување и нанесена штета на буџетот на Република Македонија со исплата на додатоците кои не се пропишани со законот за плати на членовите на судскиот совет.