„Рок музика, одлично друштво…., и тука го чекам Стево на дуел…секаде…во секое време!“, напиша на социјалните мрежи од едно кафуле во Охрид, Гордана Силјаноска Давкова. Три дена потоа кандидатот за претседател на СДСМ и ДУИ, Пендаровски, вели дека ќе го прифати повикот за ТВ дуел на противкандидатот, Силјановска Давкова, која инсистира на телевизиско соочување. “Се разбира дека ќе има дуел, помина времето на Груевски кој одбиваше дуели. Јас учествував во таков дуел и пред 5 години, нема причина сега да одбијам. Но, тоа ќе се случи во рамки на кампањата“ – изјави Пендаровски.

Во меѓувреме дуелот меѓу кандидатите за претседател веќе се случува на социјалните мрежи и е прилично занимлив. Стево Пендаровски на својот Твитер профил објави порака во која ја прозва својата противкандидатка упатувајќи критика дека “Силјаноска не е чесна, не е правично да се брани насилството од 27 Април“! На ваквата критика се надоврза и СДСМ со партиско соопштение и критика за Проф. Силјаноска.

На прозивките одговори кандидатот Силјаноска Давкова:

Прво тоа што Пендаровски ги присвои мојот слоган „за право и правда“ го сметам за мој позитивен придонес во освестувањето на власта, која го изгуби компасот уште многу одамна. Второ, како надпартиски кандидат јас сум погрешна адреса за барање (правна!?) одговорност или извинување за настаните од 27 април. Подготвена сум во ТВ дуел да ги соочам аргументите за кршењето на процедуралните правила за правично судење со Пендаровски, но и да потсетам дека токму оваа власт го амнестираше Крсто Мукоски од директната одговорност за последиците од насилството во Собранието, а со цел да обезбеди промена на Уставот.