Првоосомничениот за случајот Рекет, Бојан Јовановски доби нови 30 дена притвор.

Ваквата одлука беше донесена од страна на  Кривичниот совет кој вчера му ја продолжил мерката за уште 30 дена, неофицијално дознава „Фокус“.

Бојан Јовановски кој е првоосомничен за случајот Рекет кој ја дрма јавноста, веќе два месеци е во притвор во истражниот затвор „Скопје“, а последните 30 дена му истекуваат денес.

Тој заедно со Зоран Милевски -Кичеец и со специјалната јавна обвинителка Катица Јанева се осомничени во истрагата за случајот „Рекет“.

Според првичната истрагата, наводно бизнисменот Орце Камчев на Боки 13 и на Кичеец им дал 1,5 милиони евра за да го спасат од кривичен прогон за случајот на СЈО, „Империја“, во кој Камчев ја има улогата на осомничен, а според обвинителството, и Јанева била дел од овој случај па поради тоа беше притворена и моментално се наоѓа во затворот во Шутка.

За потсетување Боки 13 беше уапсен на 15 ти јули на Граничниот премин Богородица. 

Бојан Јовановски сопственикот на 1ТВ која сега веќе не е во функција, беше уапсен на Граничниот премин по налог на Јавното обвинителство Скопје.

Јованоски беше уапсен поради сомневање за рекет, а полицијата го привела на граничниот премин. Истовремено со него беше приведен и бизнисменот Зоран Милески познат како Зоки Кичеец кој е второосомничен во случајот Рекет. Тој е близок со поранешениот директор на УБК, Сашо Мијалков, а беше уапсен во еден скопски ресторан.

Бојан Јовановски, во јавноста познат како Боки 13 во јуни 2017 година, пред отворањето на телевизијата го стартуваше проектот „Меѓународен сојуз“ за цивилно општество и социјално загрозени категории. Тогаш потенцираше дека финансиската добивка како претседател ќе ја донира секаде каде што е потребно. 1 ТВ почна да зрачи во етерот во март 2018 година.