По гласањето, ја интензивирав комуникацијата со Нола, зошто сметав дека немавме искрен пристап кога гласаа за Преспанскиот договор. Во моментот се шпекулираше дека ќе гласам за договорот, но во моментот кога се зборуваше тоа, јас завршив со ова раководство, рече пратеничката од ВМРО-ДПМНЕ, Даниела Рангелова во емисијата 360 степени на Алсат.

Услов да се биде на пратеничка листа на ВМРО-ДПМНЕ на изборите во 2014 година беше да се прифати да се гласа за промена на името – вели пратеничката Нола Исмајлоска-Старова во интервју за 360 Степени, која беше исклучена од партијата откако гласаше за Договорот од Преспа.

„Добар дел од пратениците кои застанаа до ѕидот беа пратеници и во 2014 година. Прашањето кое ни беше поставено во 2014 година, беше дали сум спремна да гласам за промена на името, а јас прифатив да гласам за промена на името. Ми се јавија од раководството на партијата, разговарав со најмалку 10 пратеници и би било доблесно да признаат дека ги прашале“, рече Исмајлоска-Старова и додава дека не го кажала ова зошто немала шанса.

Таа вели дека е доблесно да кажат кои се тие кои прифатиле да бидат пратеници и да го сменат името.

Рангелова изјави дека неа не ја прашале истото.

„Ми се јави Груевски ме праша дали сакам да бидам пратеник, не ме праша дали сум подготвена да гласам за промена на името. Најверојатно сметалдека бидејќи сум дел од раководството, сум подготвена да гласам за се, мене не ми направија проверка“, рече Рангелова.

„Јас сум линчувана по секој настап мој од партиски ботови, од раководството немаат храброст да ми кажат во лице, ништо“.