Револтирана 65 годишна скопјанка која боледува од автоимуни заболувања за Магазин.мк вели дека од 12-ти март не ги прима потребните лекови Плакенил 200мг, бидејќи како што вели во аптеките ги нема, и секаде го добива истиот одговор, лековите се однесени на инфективната клиника бидејќи истите и други слични лекови се користат за пациентите заболени од Коронавирус.

Имам 65 години, меѓу другите го користам редовно лекот Плакенил 200мг, со кој се снабдував кога го немаше во нашите аптеки(дури од ноември) од други држави, воглавно од Грција и од Србија. Сега со затворање на границите не можам да го добијам лекот без кој не можам да функционирам.

Оставена на милост и немилост Виолета вели дека мора да се снаоѓа сама, и да функционира без лекот кој и е неопходен. Вели и покрај тоа што министерот за здравство вели дека нема недостиг на лекови во државата, и дека се спремни за моменталната ситуација со Коронавирусот, сепак таа во секоја аптека го добива истиот одговор: Лекови нема!

Матичната докторка и аптекарите ми одговараат идентично, дека лекот што го имале по аптеките и магацините е однесен со другите слични лекови на инфективно за лекување на пациентите заболени од коронавирус. Дали ние пациентите кои боледуваме од автоимуни заболувања треба да одиме пред инфективно да се заразиме од коронавирус, за да го добиеме лекот кој ни е неопходен за нормално функционирање. Јас не можам без тој лек, немам од кај да го набавам сега кога границите се затворени. Спаѓам во ризична група на луѓе и апелирам до министерот за здравство Венко Филипче, да посвети внимание на нас, и на луѓето со ретки болести. Ни беше ветено дека ќе добиеме лекови, но од 12 март покрај останатите лекови кои ги пијам , лекот Плакенил 200мг, не можам да го добијам. Стравувам за својот живот, лековите ми се неопходни за да може да функционирм.