Денеска на социјалната мрежа Фрејсбук пратеничката Фросина Ременски ги потсети сите дека истекуваат шест месеци откако Никола Груевски избега од земјава и престојува во Унгарија.

Таа ги повикува институциите да го истражат бегството на поранешниот премиер на земјата Никола Груевски.
Нејзината објава ви ја пренесуваме во целост.

„Денес истекуваат 6-те месеци неоправдано отсуство од работата на Собранието на пратеникот азилант Никола Груевски.
Пред сериозен тест и одговорност на сите пратеници е спроведувањето на процедурата за одземање на мандатот со 80 гласа “за”.
Пред сериозен тест е Обвинителството и Врховниот суд – ОЈО да даде одговор за истрагата за бегството, а Врховен суд да одолее да не ја укине пресудата за затворската казна.
Во меѓувреме, бидејќи се распишал азилантот очекувам да објави книга за неговото “храбро” бегство, како лекција – модус операнди за криминалистите, а роман за сите останати …“, напиша Ременски на својот фејсбук профил.

Министерот Спасовски вчера уверува дека сите потребни документи се испратени и очекува Интерпол да ја потпише меѓународната потерница за Груевски.

„Ние неколку пати контактираме и ги поднесуваме сите потребни документи. Значи преку Министерството за внатрешни, Министерството за правда – сите документи се обезбедени и доставени до ИНТЕРПОЛ. Тие се уште вршат некакви испитувања за тоа дали потерницата ги исполнува критериумите за објавување на ИНТЕРПОЛ“, вели Оливер Спасовски, Министер за внатрешни работи.