Филип Рикер е во посета на нашата земја, тој имаше средба со лидерот на ВМРО-ДПМНЕ Христијан Мицкоски и премиерот Зоран Заев.

Тој по средата со Заев изјави дека очекува наскоро на Самитот во Лондон земјава да стане 30-та членка на НАТО, а на есен да го добие датумот за преговори со ЕУ. САД, како што рече, иако не се дел од ЕУ, постојано и даваат поддршка на Северна Македонија на тој пат, но и на билатералните средби со земјите членки ги поттикнуваат есенва државата да го добие долгоочекуваниот датум за преговори.

Имате, додаде тој, постигнато многу и треба да ги исполните зададените критериуми.

– На денешната средба со премиерот Заев ја подвлековме важноста од донесувањето на законот за јавно обвинителство. Имаме добра основа во предлогот и се радувам на неговото изгласување. Се надевам дека овој процес ќе заврши брзо заедно со опозицијата. Се надевам дека опозицијата, не само тука и во другите земји ќе биде витална за нивната иднина. Ова е одличен момент за сите да се здружат и да го завршат процесот, рече Рикер.

Премиерот Зоран Заев е задоволен што Северна Македонија наскоро ќе стане членка на НАТО, што, како што рече е една од стратешките определби на земјата. Тој посочи дека досега 21 земја го ратификуваа протоколот за пристапување во НАТО, а САД, рече, го почнаа овој процес и во нивниот Сенат и очекува дека во септември или октомври оваа постапка ќе биде успешно завршена.

Заев верува и дека земјава наскоро ќе го добие долгоочекуваниот датум за преговори за што ја нагласи и исклучителната поддршката на САД во нашите аспирации за членство во ЕУ.

– Сите навестувања се дека во октомври ќе стигне долгоочекуваната одлука за старт на преговорите. Никој не сака нови разочарувања и изневерени ветувања, ниту во ЕУ, ниту дома, ниту во регионот. Никој не сака да се отвори шанса за зголемено влијание на недобронамерните страни во земјата и регионот. Сите го очекуваат признанието за исполнетите демократски реформи за најдоброто можно решение, за прашањето за соседите и за определбата на нашата земја да биде дел од западниот демократски свет, рече Заев.

Мицкоски, како што соопшти ВМРО-ДПМНЕ, укажал и на важноста од бескомпромисна борба против корупцијата и криминалот од секаков тип.

Теми на средбата биле и развојот на меѓусебните односи, актуелната политичка состојба и реформските процеси важни за државата.

– Мицкоски на средбата ја изрази својата загриженост поради лошата економска и политичка состојба и ја нагласи потребата за засилени реформи во процесот на исполнување на стратешките приоритети на Република Македонија, се вели во соопштението на ВМРО-ДПМНЕ.

Соговорниците ја истакнале важноста за развој на македонско-американското стратешко пријателство и поддршката на процесите важни за државата. Мицкоски ја потврдил заложбата на ВМРО-ДПМНЕ за заедничка соработка и развој на македонско-американските односи.

Претходно, по средбата со Мицкоски во седиштето на партијата, Рикер изјави дека од опозицијата очекува конструктивност за законот за јавно обвинителство.

– Имавме искрен и отворен разговор со лидерот на опозициската ВМРО-ДПМНЕ Мицкоски и со претставници на партијата во кој ги повторив истите пораки како и утрово. Се надевам на позитивен исчекор кога станува збор за владеењето на правото, СЈО и за Јавното обвинителство, бидејќи тоа е многу важно за европската перспектива на Северна Македонија, рече Рикер по едночасовната средба со Мицкоски.