Шефицата на Обвинителството за организиран криминал и корупција, откако вчера лидерот на ВМРО-ДПМНЕ, Христијан Мицкоски упати критики кон неа за „Дојче Веле“ рече дека  досега никој не и се јавил за да влијае да постапува вака или онака, или за да не постапува.

Мицкоски на вчерашниот собир јавно изрази незадоволство од постапувањето на Обвинителството. 

„И еве, поминаа повеќе од 48 часа, а нема никаква, никаква суштинска реакција ниту од Рускоска, ниту од било кој друг. Ако Заев е ‘капо де тути капи’ на мафијата, главните советници и верни заштитници на неговиот криминал се Вилма Рускоска и Љубомир Јовевски, запаметете ги овие имиња. А, гледаме дека ништо помалку не биле ни тие од Врховниот суд, врховните судии. Нивните усти се замолкнати, додека ни се уништува државата, додека ги губиме институциите. Овие двајца, плус уште неколку врховни судии засилени со уште неколку медиумски слуги кои не се новинари, а така се претставуваат, се единицата за брза интервенција за спасување на Зоран Заев“, обвини Мицкоски.

Обвинителката Вилма Рускоска за Дојче Веле рече дека откако пратеникот Милошоски и ги доставил аудио снимките, таа ќе постапи како што постапува и за секоја друга“.

„Вчера Антонијо Милошоски ме праша каква е понатаму процедурата со аудио-снимката што ја достави. Направив една паралела. Кога Јордан Камчев дојде да поднесе пријава, достави аудио и видео снимки, а при поднесувањето на записникот за кривичната пријава посочи и лица кои би можеле да посведочат за веродостојноста на тоа што тој го кажува. И додека се чекаше вештачењето на материјалите што ни ги достави, лицата што ги посочи беа повикувани да дадат исказ. Му сугерирав и на Милошоски – ако може да посочи сведоци, бидејќи така многу би се забрзала постапката“, вели обвинителката Рускоска.