Американскиот Сенат со огромно мнозинство денеска го ратификуваше Протоколот за членство на нашата земја во НАТО.

Сенатот на Соединетите американски држави со 92 гласа „за“ и два „не“ го изгласа пристапниот протокол за влез на Македонија во НАТО.

Протоколот за членство на Република Македонија беше испратен до Сенатот од американскиот претседател Доналд Трамп на 30 април оваа година. 

-И честитаме на земјата за сите напори и напорна работа за постигнување на оваа цел. Очекуваме во блиска иднина да ви посакаме добредојде како 30 земја НАТО сојузник, објави Амбасадата на САД во земјава на својата Фејсбук страница.

Ратификацијата ја поздрави и амбасадорката Кејт Брнс, оценувајќи ја како резултат на напорна работа и посветеност кон вложување во иднината.

– Многу сум задоволна поради огромната поддршка во Сенатот за ратификацијата на пристапниот протоколот на Северна Македонија во НАТО. Тоа е резултат на напорна работа и посветеност кон вложување во иднината. Со нетрпение очекувам продолжување на развојот и зајакнување на партнерството меѓу нашите две земји, порача на Твитер американската амбасадорка Брнс.

За 9 месеци, Протоколот за членство во НАТО го ратификуваа 25 држави.

Покрај Америка, недостасуваат уште четири земји да ги завршат процедурите, по што и официјално ќе станеме полноправна членка на Алијансата.