Денеска е католичкиот Велигден, па по тој повод една од најпознатите хрватски музички ѕвезди Северина на својот Инстаграм профил објави емотивна порака посветена на нејзиниот син Александар. 

Таа во пораката практично се пожали на своите фанови дека е скршена од болка што овој голем празник го минува без својот син бидејќи како што вели иако овој викенд би требала да биде со синот, сепак не е.

-Мојата мала  љубов, која по некоја привремена мерка припаѓа половина од велигденските празници и понатаму не е со мене. Денес е точно  30 полни дена како не сум го допрела, гушнала, погалила по коса, почувствувала и заспала покрај него. Затоа додека го чекам тој момент, јајцата ги бојадисав како и минатите седум години, колку Велигдени помина со мене, рече таа.

Оваа привремена мерка ја донесе судијката од Општинскиот граѓански суд во Загреб. Според таа мерка Северина има право да го гледа синот во вторник и четврток од  15 до 20 часот и секој втор викенд од сабота од 10 до недела до 20 часот.  Со оваа мерка е регулирано и дружењето на мајката и синот во текот на летните и зимските празници, како и државните и верските.

Пејачката минатиот месец јавно се пожали дека кога се вратила од Србија отишла да го посети својот син но од нејзиниот поранешен сопруг Милан Поповиќ добила одговор дека тој и синот се ставени во самоизолација, бидејќи на почетокот на март биле во Австрија а за тоа не ја информирал.