Сезонскиот грип денеска ја зема и третата жртва во државата. Имено од компликации од грип почина 50-годишен човек, соопштија од Институт за јавно здравје.

Како што велат од таму починатиот имал хронични болести а смртта настапила по компликации од сезонскиот грип, на институтот за пулмологија, каде и се лечел.

Бројот на заболени од грип и натаму се зголемува. Бројот на ученици болни од грип е алармантен, но и покрај тоа децата продолжуваат со настава. Само оваа недела се регистрирани нови 5.660 заболени, што е за 74% повеќе од минатата недела.

Од Институтот за јавно здравје информираат дека најголем број од заболените лица припаѓаат на возрасната категорија од 15 до 64 годишна возраст.

-Сите индикатори укажуваат на зголемена активност на вирусот на грип. За овој период од годината е очекувано да имаме тренд на пораст на заболени од грип и овој тренд ќе продолжи во наредната недела или две, по што очекуваме да се стабилизира и да почне да опаѓа бројот на новозаболени, рече д-р Гордана Кузмановска од Институтот за јавно здравје.

Комисијата за заразни болести редовно ја следи состојбата со грип во државата и согласно стручните препораки се забранети посетите на хоспитализирани пациенти во јавните здравствени установи, со цел да се спречи натамошно ширење на грипот.