Се чудам од каде смрдеше рибата?! Народот ќе ви ја испорача „Метлата” на 5 мај!, напиша на Твитер Гордана Силјановска-Давкова откако вчера на трибина Заев најави чистка.

Кандидатката за претседател на Македонија на ВМРО-ДПМНЕ и коалицијата Гордана Силјановска вели дека политиката мора да се врати во рамките на правото. „Само ако законите се во согласност со Уставот и ако тие се применуваат подеднакво за сите нас, може да ја вратиме довербата во институциите“, напиша на Твитер Силјановска.

Според премиерот и лидер на СДСМ Зоран Заев со изборните резултати на нивниот кандидат Стево Пендаровски граѓаните упатиле порака за незадоволство од функционерите најавувајќи дека ќе следи „чистка“.

– Пораката е дека има незадоволство од функционери, од централната, од локалната власт. Им возвраќам, ќе има чистка, секако дека ќе има чистка. После изборите ќе се случат промените. Редот е да ја испратам мојата порака до тие што останаа дома, државата ни е во прашање. Пораката ја испративте, но немојте да ја казнувате државата поради локалната или централната власт, порача Заев на синоќешниот митинг во општина Карпош.