Истражувачката екипа на Магазин откри уште едно звучно име меѓу надворешните соработници на премиерот, станува збор за надалеку познатиот Иван Исцелител. Заев има вкупно 39 надворешни советници од речиси сите области – од економија, дипломатија, регионална политика, спорт, односи со јавноста, но сепак му фалел советник кој е видовит и може да помогне во предвидувањето на датумот за членство на Македонија во ЕУ. Иван Исцелител го гледал во живо обраќањето на премиерот Заев во Собранието и веднаш потоа му се јавил и му ги понудил своите советнички услуги. Пресудно за ангажманот на Иван Исцелител било што го уверил премиерот Заев дека има директни конекции со кабинетот на канцеларот Курц во Виена, на кого вчера му предвидел дека завчера ќе му биде изгласана недоверба на владата. Ваквиот силен аргумент бил доволен за Иван Исцелител да биде ангажиран за  советник за „телепатска и парапсихолошка соработка со Австрија и Кнежевството Лихтенштајн“, за месечен хонорар од 66.000 денари. Иван Исцелител инсистирал во хонорарот да има две шестки, заради совпаѓање со нумеролошката вредност на Виена, на што Заев се согласил. Се очекува плодна соработка!