Зоран Милановиќ, новоизбраниот претседател на Хрватска, чиј мандат започнува на полноќ, со цвеќе и бакнежи ја испрати досегашната претседателка, Колинда Грабар-Китаровиќ.

Со тоа заврши церемонијата на инаугурацијата на Милановиќ како петти хрватски претседател.

Во тој момент, оркестарот на хрватската армија ја изведуваше „Ние сме гарда на Хрватска“ на влезот од Пантовчак.

Претходно, во претседателскиот кабинет се одржа полчасовна примопредаја на должноста.

Локалните медиуми, исто така, потенцираа дека Зоран Милановиќ и неговата сопруга Сања  Милановиќ на церемонијата носеле модели од домашни дизајнери.

Зоран Милановиќ денеска положи заклетва во Пантовчак, со што стана петтиот претседател на Хрватска и трет по ред претседател кој доаѓа од редовите на Социјалдемократската партија.

Пејачката Јосипа Лисац ја испеа хрватската химна „Нашата убава татковина“, а потоа со минута молчење беше оддадена почит до сите оние кои ги дале своите животи за независна Хрватска.