Изјавата на министерот за внатрешни работи, Оливер Спасовси, дека нема вина кај органите на прогонот од ресорното министерство, и ги отвори “можностите” на Јанева да побара притвор за најмалку 100 лица.

Имено Спасовски на новинарско прашање дали ќе поднесе оставка по бегството на пратеникот Никола Груевски, изјави дека нема да го направи тоа и дека виновни за чинот не се припадниците на МВР туку судиите кои навремено не изрекле мерки притвор туку го оставиле обвинетиот слободно да шета низ државата.

На ова се огласи и Јанева, изјави дека чека потврда дека обвинетиот Груевски е во бегство по што СЈО ќе изготви листа на приоритетни осомничени за кои ќе побара времена мерка притвор како безбедносна гаранција.

Воедно ингеренциите дека Обвинителството, било тоа Специјално или “обично” е тоа што решава за притвор ги потврди и претседателот на Кривичниот суд Скопје, лично.

Не може судот самоиницијативно да определува мерка притвор, тоа е секогаш по барање на Обвинителството. Во случајот „Тенк“ од самиот почеток на подигање на обвинението до соопштување на одлуката од страна на Обвинителството во ниеден момент не е побарана мерка притвор за обвинетиот Никола Груевски. – изјави денеска претседателот на Кривичниот суд Иван Џолев.

Посочи дека двата пасоши на Никола Груевски и дипломатскиот и неговиот личен пасош се одземени и определена е мерката јавување во предметот „Титаник“, додека во предметот „Тенк“ нема никаков предлог ниту за обезбедување на некаков  имот, ниту предлог за  некакви си мерка за  обезбедување негово присуство.

МВР точно е дека постапува согласно наредбите и решенијата коишто ги носи Судот, меѓутоа не треба да заборавиме дека постапува и согласно наредби коишто се даваат од страна на Обвинителството, како и самоиницијативно кога станува збор за сузбивање на криминал или спречување еве во конкретниов случај некое лице без пасош да ја напушти нелегално државата доколку се воспостави дека такво нешто се случува. – појасни Џолев.

Во однос на објавата социјалните мрежи на поранешниот премиерот Никола Груевски во која вели дека е во Унгарија каде што побарал политички азил од тамошните власти, Џолев рече дека тоа треба надлежните државни органи најпрвин да го утврдат од каде е воспоставен линкот, дали станува збор за  преусмерување на истрагата  и слично.

Во оној момент кога надлежните органи ќе утврдат дека обвинетиот не се наоѓа во земјата, или ја потврдат автентичноста на информацијата дека истиот се наоѓа во Будимпешта, и за тоа го извести судијата за извршување санкции, судијата веднаш ќе издаде наредба за распишување на меѓународна потерница. – посочи Џолев.