142 лица обвинети во предметите на СЈО а најчесто дело за кое се гонат обвинетите е злоупотреба на службената положба и овластување – ова го покажува првиот преоден извештај на ОБСЕ а се однесува за периодот од септември 2015 до јануари 2018 година, околу активностите и предметите на СЈО.

Специјалното јавно обвинителство води 20 предмети,  три од нив се поврзани со скандалот со прислушување против „авторите“ на нелегалното прислушување и 17 предмети кои произлегуваат од прислушуваните разговори и наводните кривични дела кои беа откриени со пресретнатите комуникации.

Од Јавното обвинителство, СЈО презеде четири предмети – „Монструм“, „Пуч“, „Сопот“ и „Шпион“.

Во извештајот стои дека за 20 истраги на СЈО се подигнати обвиненија заклучно до 30 јуни 2017 година во кои се опфатени 142 обвинети, вклучително и 7 компании. 20 обвиненија се потврдени до крајот на јануари годинава, едно е делумно потврдено, а СЈО во моментов води 12 истраги.

Најчестото дело кое се гони од страна на СЈО е злоупотреба на службената положба и овластување (9 случаи). Други клучни дела кои ги гони СЈО се злоупотреба на средства за финансирање на изборна кампања, повреда на избирачкото право, злоупотреба на постапката за јавен повик, даночно затајување, примање награда за провизаконско влијание. Во два случаи се наведува постоење широки криминални мрежи кои се изведуваат преку криминално здружување.