Поранешниот премиер Владо Бучковски, лидерот на ДУИ, Али Ахмети и поранешниот министер за животна средина, исто така од редовите на Демократската унија за интеграција, Муса Џафери, наводно зеле мито во износ од 7,5 милиони евра за да го одложат воведувањето на трет мобилен оператор во Македонија, се наведува во тајниот документ кој вчера го објави обвинителката на СЈО, Лиле Стефанова, која го води обвинението за аферата „Маѓар телеком“.

„Дали знаете дека 2,5 милиони евра, според неформалниот документ, требало да бидат исплатени на претставникот на страната А, Владата претставена од Бучковски и 5 милиони евра на „пријателите од Тетово”, А. А. и М. Џ., прашала Стефанова.

Главен сведок на ова рочиште беше поранешниот министер за транспорт и врски, Џемали Мехази, но тој, иако го потпишал протоколот во име на Владата за соработка со ,,Маѓар Телеком,“, не се сеќаваше на ништо.Со обелоденувањето на овој документ и со тоа што како сведок идната недела на 27 март во судот е повикан Слободан Богоески, кој во сведочење пред американските власти за прв пат ги спомена имињата на тројцата политичари кои наводно зеле мито, се посочуваат практично клучните лица околу кои се одвива целата афера и обвинението.

Тројца ексдиректори на „Маѓар телеком“, Елег Штрауб, Андраш Балог и Тамаш Морваи, во паралелна постапка што се водеше пред унгарските власти за истиот случај беа обвинети дека во 2005 и 2006 година на македонски функционери им исплатиле мито од приближно 4,8 милиони евра за да ја одложат либерализацијата на телекомуницискиот пазар.