На минатонеделниот форум „Армија 2018“ во Русија, една од најоглемите изложби на оружје и воена техника во светот, делегацијата на Србија најголемо внимание му посветила на борбениот хеликоптер Ми-35.

Во моментов се работи на тоа првите „триесетипетки“ во Белград да пристигнат за големата воена парада која се одржува во ноември по повод победата во Првата светска војна.

Според српскиот воен експерт Светозар Јокановиќ, Ми-35 е всушност извозната ознака на најпознатиот руски борбен хеликоптер Ми-24В „крокодил“, чие сериско производство почна уште во далечната 1976 година.

„По бројните унапредувања остана во производство до денешен ден и сѐ уште е баран на светскиот пазар. Претставник е на советската концепција на јуришен борбен хеликоптер која подразбира оклопен и силен хеликоптер, кој повеќе се потпира на брзината отколку на своите маневарски способности. Таквиот хеликоптер е поуспешен при дејство од налет отколку при лебдење или при мали брзини“, вели Јокановиќ.

Тој истакнува дека Ми-35 денес и не е најдобриот борбен хеликоптер кој се произведува во Русија. Новите Ми-28 и Ка-52 се посовремени концепции и пружаат поголемо ниво на заштита на екипажот, имаат значително подобри маневарски карактеристики, помоќни сензори и вооружување, но нивната продажна цена и трошоците за одржување се значително повисоки.

„Покрај тоа што е поекономично решение за земјите како Србија, Ми-35 има една особина која неговите конкуренти ја немаат – покрај огнената поддршка на трупите на земја овој хеликоптер може да се користи за специјален десант (може да превезува до осум војници со лично вооружување), за транспорт на оружје и опрема или медицинска евакуација на ранетите од линијата на фронтот“, вели Јокановиќ.