Српскиот професор Ратко Ѓукановиќ кој е еден од најдобрите светски експерти за астма и хронични опструктивни болести на белите дробови, заедно со двајца колеги од Универзитетот во Саутхемптон дошол до големо откритие во лекувањето на пациентите заразени со коронавирусот, пишува „Телеграф.рс“, пренесува Медицина и здравје.

65 годишниот српски експерт и професорите Стивен Хојгејт и Дона Дејвис пред 20 години откриле дека протеинот интерферон бета кој помага кај настинка, им недостасува на оние кои боледуваат од астма и хронични болести на белите дробови. Врз основа на тоа, нивната компанија „Synairgen“ развила негова замена која им помага на пациентите со вирусни заболувања, пишува „Гардијан“.

Клиничкото истражување на нивниот лек SNG001, базиран на интерферон бета, е завршено пред неколку дена и покажало дека пациентите заразени со коронавирус имаат два до три пати поголеми шанси за закрепнување со оваа терапија отколку со плацебо. На примероците од 101 заразен било утврдено дека шансите за развој на тежок облик на болеста се помали за 79 отсто, додека чувството за губење на здив е исто така драстично намалено.

Директорот на компанијата „Synairgen“ Ричард Мардсен е пресреќен поради резултатите.

– За нив нема ништо подобро од тоа кога ќе видат дека нивниот лек лекува пациенти, а притоа заработуваат пари – рекол Мардсен откако акциите на неговото претпријатие скокнале за 540 отсто неколку часа по објавувањето на резултатите од студијата на 21 јули.

Од почетокот на годината вредноста на овие акции пораснала за неверојатни 3.000 отсто.

Бидејќи сите тројца научници имаат удел во компанијата, тие практично преку ноќ станале милионери, па така 0,56 отсто од акциите на доктор Ѓукановиќ сега вредат 1,6 милиони фунти (околу 1,75 милиони евра).

Клиничката студија е проширена на пациенти со поблага форма на болеста, додека на фармацевтската компанија „Rentschler“ ѝ е наложено да произведе милион дози пред следниот бран на епидемијата, што се очекува во Велика Британија оваа зима.