Стојанче Стоилов, капитенот на Вардар, си остана на дадениот збор и му допушти на Иван Карачиќ да го дигне трофејот за втората европска титула на црвено-црните во историјата, зашто хрватскиот репрезентативец го одигра последниот меч пред заминувањето летово во Кјелце.

Македонскиот капитен на Вардар, Стојанче Стоилов уште на финалето во СЕХА-лигата изјави дека на еден од најомилените ракометари на вардаровата публика ќе му допушти оваа сезона да ги крене сите трофеи.

Хрватот Карачиќ е избран за најдобар играч (МВП) на финалето денеска на фајнлфорот во Лигата на шампионите.

Тој достоинствено и херојски го изигра овој фајнлфор, со температура од 39 степени, па вчера во полуфиналето се повреди и на раце беше изнесен од теренот. Херојот ништо не го спречи за да игра денеска и да биде главен на теренот и заслужено да ја понесе наградата за МВП.

Меѓу првите честитки за новата титула на Вардар дојде од ривалот од полуфиналето Барселона.

Секоја чест за шпанскиот гигант кој веднаш му оддаде чест на нашиот тим.

Меѓу честитките се придружија претседателот на Република Македонија, Стево Пендаровски, премиерот Зоран Заев и лидерот на ВМРО ДПМНЕ, Христијан Мицковски.