На вкупно 500 километри патна мрежа во државата се работи во овој момент, од кои над 120 километри само околу Куманово, рече денеска министерот за транспорт и врски Горан Сугарески.

Според министерот Сугарески околу 60 милиони евра, се инвестираат во патната и комунална инфраструктура во Куманово.

– Предвидени се уште 450 километри да се реконструираат патишта низ целата држава, некаде сме на средина од градежната сезона, и очекувам до крајот на градежната сезона се она што сме го исполниле преку ЈП за државни патишта, дали преку кредитни линии, нивни средства, дали по основ на Македонија пат, навистина целосно ја подобриме патната инфраструктура и на тој начин да обезбедиме поголем, побрз и побезбеден транспорт на граѓаните од нашата држава, изјави Сугарески.

– Кога прашав кога последен пат овој пат е чепнат ми рекоа од времето на Тито, значи 50 години никој овие патишта не ги погледнал. И друг пат имам кажано не е лошо да се градат нови патишта, но тоа не значи дека треба да ги заборавиме старите патишта и да ги оставиме на забот на времето. Патот Куманово – Свети Николе 42 километри, веќе 10 километри е комплетно завршен, 15 километри е завршен со прв слој асфалт и од следната недела започнува вториот слој, изјави Китанов.

Според Китанов, рокот за завршување на магистралниот пат е до пролетта. Со оваа магистрала, распишани се тендери за два моста, а на Градежниот факултет завршува проектирањето за големиот т.н. „Искрин мост” на реката Пчиња, кој ќе чини околу 2,5 милиони евра.