Тајфунот Хагиби направи хаос во Јапонија каде бројот на настрадани лица нарасна на 40, додека екипите за пребарување и спасување продолжуваат да трагаат по 17 исчезнати во областите од централниот и источниот дел на земјата.

Повредени се најмалку 180 лица како последица од ударите на тајфунот, а околу 38.000 лица се евакуирани од своите домови, наведува агенцијата Кјодо.

Тајфунот Хагиби на островот донесе рекордни количества дождови, па за само 48 часа се излеаја дури 20 реки, што до сега е невидена појава.

Како што пренесуваат американските медиуми спасувачките екипи ги пребаруваат подрачјата околу надојдените реки и свлечишта во потрага по исчезнати, а властите предупредуваат дека се можни нови врнежи.

Тахфунот Хагиби предизвика големи налети на дожд и силни ветрови во текот на викендот, кога беа поплавени и оштетени повеќе илјади домаќинства, а голем дел од главниот остров остана без струја.

Премиерот Шинзо Абе кажа дека владата ќе формира посебен тим за катастрофи.

-Нашиот одговор мора да биде брз и примерен, рече Абе , нагласувајќи дека многу лица се исчзанати, а штетите се големи.

Властите соопштуваат дека 60.000 домови во Токио и околните префектури се уште се без струја, а железницата соопшти дека железничкиот сообраќај е ограничен на градовите Нагано и Токио.