Шведската полиција го уапси Дејан Давидовски, кој е обвинет за тероризам при организираниот напад на Собранието на 27 април 2017, потврдија за САКАМДАКАЖАМ.МК од македонското Обвинителство, од каде што изјавуваат дека Македонија побарала негова екстрадиција.

Шведскиот весник „СВТ нихетер“, објави дека 39-годишниот Дејан Давидовски, по кого пред една година има распишано меѓународна потерница и по кого трагаше Интерпол, е уапсен во Шведска, на аеродромот Скаваста. 

Дејан е македонски државјанин, но тој патувал со документи од друга европска земја каде што и привремено живеел. Има шведски број на социјално осигурување, бидејќи бил со постојано работно искуство во Шведска.

Кога давал изјава за шведската полиција, тој негирал дека ќе има никаква врска со нападот на Парламентот во Република Македонија. По барањето на шведските обвинители, окружниот суд му одредил притвор, бидејќи постои голем ризик обвинетиот да избега надвор од државата!

Највисока казна од 18 години затвор доби поранешниот директор на Бирото за јавна безбедност, Митко Чавков кој во деновите пред и за време на упадот во Собранието бил носител на златна команда во МВР.

Тогашните колеги на Чавков од МВР, Митко Пешов, Душко Лазаров, Горан Ѓошевски-Леви добија по 15 години затвор, Оливер Поповски- 13 години, а Оливер Радулов- 10 години затвор. Мунир Пепиќ од Агенцијата за разузнавање е казнет со 15 години затвор, а Абдуљфета Алими е осуден на 7 години затвор.

Од осомничените кои со фантомки влегоа во Собранието, највисока казна добија Јане Ченто, Влатко Трајковски и Никола Митревски-Кољо – по 15 години затвор; Вилијам Михајловски доби 14 години затвор, Игор Југ и Горанче Анѓелковски по 12 години затвор, а Александар Василевски-Нинџа доби 8 години затвор.