Светозар Петровиќ, осуден на 18 месеци затвор за „лажно идентификување“, беше уапсен вчера околу  21:30 часот.

Полицијата го уапси Светозар Петровиќ, за „лажно идентификување“. Тој и е познат на полицијата по тоа што беше еден од членовите на протестите „За заедничка Македонија“ и еден од оние кои насилно упаднаа во Собранието на 27 април, пренесе Курир.

Инаку Светозар е познат како „Лаки Арамбаша” под чие име долго време беше во бегство.

Полицијата вчера го лоцирала во куќа во скопската населба Кисела Вода, врз основа на оперативни информации. Лаки Арамбаша бил забележан во близина на општинската установа и поради извршната одлука веднаш бил испратен во затворот Идризово.

„Лаки Арамбаша” беше еден од организаторите на протестите „За заедничка Македонија”, а обвинителството за организиран криминал и корупција поднесе обвинение за организирање на насилството во Собранието. Тој е познат како близок роднина на Тодор Петров, претседателот на македонскиот Светски конгрес.

Пријавен е и за говор на омраза на социјалните мрежи.

За потсетување упад во Собранието на Македонија познат и како „Крвавиот четврток“ е насилен инцидент кој се случи на 27 април 2017 година кога околу 300 лица од здружението „За заедничка Македонија“ упаднаа во Собранието на Република Македонија со цел да го спречат изборот на Талат Џафери за претседател на Собранието на Македонија. И покрај упадот и насилството, Џафери беше избран за претседател на Собранието, а неговиот избор беше признат од САД, Европската Унија, како и од меѓународната заедница освен Русија. Два дена по настанот, полицијата приведе неколкумина учесници во нападот на Собранието. Помеѓу напаѓачите имаше и  вработени во полицијата и армијата, како и поранешни затвореници осудени за тешки кривични дела.