Специјалната јавна обвинителка Фатиме Фетаи во вчерашното гостување на 1ТВ во интервјуто кај Сашо Ордановски зборуваше за падот на довербата во СЈО, како и за политичките препирки меѓу власта и опозицијата дали госпоѓата Катица Јанева треба да остане на чело на СЈО или треба да се повлече од таа позиција. Премиерот Зоран Заев пред неколку месеци изјави дека нема да се откаже од Катица Јанева, додека Христијан Мицкоски и Антонио Милошоски од ВМРО-ДПМНЕ во неколку наврати кажаа дека за нив обвинителката Јанева нема капацитет да биде на чело на СЈО, доколку истото стане составен дел од Државното обвинителство. Еве што кажа обвинителката Фетаи на прашањето што доколку Катица Јанева ја сменат од СЈО:

“Како мислите да се смени Катица Јанева? Зарем таа жена од јавното обвинителство, која прва повлече нога да се направат позитивни промени во правото и правдата во Македонија, заслужува да биде сменета од челната позиција? Јас можеби и не сум толку битна, но битна е Катица Јанева која го понесе целиот товар и се соочуваше со притисоци, закани, дури беше и таа што освен за своето семејство се грижеше и за сите нас што прифативме да работиме со неа во СЈО. И реално не очекувам и еве најотворено лично не сакам Катица Јанева да биде тргната од таа позиција.“

Обвинителката Фетаи истакна дека сите закони зависат од политичарите, но дека таа очекува законот за обвинителството да се донесе во пет до дванаесет, можеби на 14-ти септември оваа година, ден пред истекот на мандатот на СЈО. Кажа дека таа лично нема никакви кариерни планови, барем не додека не го заврши случајот “Монструм“ врз кој СЈО превзеде надлежност, а се однесува на бруталната егзекуција на петте момчиња кај Смилковското езеро за Велики четврток. Фетаи смета дека СЈО имало нагло растење на довербата и па дури и глорифицирање на трите обвинителки, уште по првата прес конференција кога се формираше обвинителството. Потоа имале пад на довербата која се должела на разни субјективни и објективни околности, но цени дека сега како обвинителство се предмет едно разочарувачко чаршиско муабетење „и овие не ги бива“.