Во интервју за Радио Сараево, претседателка на Комисијата на Европскиот парламент за стабилизација и придружување на Србија кон ЕУ, Тања Фајон истакна дека Франција ја зеде цела Европска унија за свој заложник.

Фајон е долгогодишна пратеничка во Европскиот парламент од Словенија и истакна дека ЕУ направи грешка што не отпочна преговори со Албанија и Македонија.

– Франција ја држи цела ЕУ за свој заложник, рече таа, дополнувајќи дека сега на тест е посветеноста на ЕУ кон европската интеграција на Западен Балкан. Таа потенцираше дека европската интеграција на Западен Балкан била и останува стратешка политика во заеднички интерес.

На прашањето дали со таа одлука се отвора простор за влијание од земји како Русија, Кина и Турција, Фајон одговори позитивно.

– Сега сме во ситуација кога се уште ја чекаме новата Европска комисија. Ние, секако, бевме многу јасни дека одговорноста за неносење позитивна одлука не е во земјите кои со право се надеваат на позитивен резултат. Тие го исполнија она што го ветија. Унијата е таа која не го оствари ветеното поради внатрешни прашања. Тоа наштетува на кредибилитетот на Унијата, и не само на Западен Балкан, туку и пошироко, категорична е Фајон.

Фајон вели дека Загреб ќе преземе голема одговорност, со оглед на тоа дека по првпат ќе биде на чело на ЕУ.

– Јас очекувам дека ќе ја преземе таа одговорност – одговорно и оти ќе биде пријател на сите земји од регионот, а посебно на БиХ. Хрватска има големо искуство и може да помогне на таа земја (БиХ) на европскиот пат. Тоа е сè што очекувам, рече Фајон, дополнувајќи дека нејзините очекувања ги споделуваат многумина во Брисел.