Меѓународниот фестивал во Швајцарија, кој сега го носи името „Џипси – фестивал“, од сега па натаму ќе  го носи името на кралицата на ромската музика Есма Реџепова.

Инаку овој фестивал се одржува секоја година во Цирих, Швајцарија, а годинава по  13. пат претставник на нашата земја беше бендот „Есмас бенд“, чиј вокален солист сега е Елеонора Мустафова, единствено девојче што го одгледа големата хуманитарка, заедно со 46 машки деца.

Инаку бендот бележи многу успеси и во моментов се подготвува за турнеја низ Европа, во организација на овој фестивал, на кој ќе настапат заедно со ромски музичари од Шпанија, Индија, Бугарија и од Швајцарија.

Во интервју за Фокус Симеон Атанасов, кој е едно од децата кои ги одгледа легендарната Есма Реџепова, и кој до крајот на нејзиниот живот и беше менаџер, изјави дека ова само е доказ колку странците ја почитуваа Есма Реџепова.

Симеон заедно со ,,Есмас бенд” настапи на фестивалот во Цирих, и изјави дека по кој знае кој пат, повторно се докажало дека кралицата на Ромската песна, Есма, е многу повеќе ценета и почитувана надвор од нашата земја. 

-На 13 – от Џипси Фестивал кој се одржа во Цирих, настапи и ,,Есмас бенд”. Традицијата продолжува. На манифестацијата каде Есма беше честа гостинка, сега продолжуваме со учество ние, нејзините музички наследници. Нашиот пријател Кристијан Фоцх не покани да настапиме со неколку песни и така да ги потсетиме сите обожаватели на музиката на нашата Мајка Есма. Публиката беше воодушевена, не пречекаа и испратија со овации. Очигледно е дека песните на Есма оставија траг кој не може да се избрише, таа живее во срцата на нејзините почитувачи низ целиот свет – раскажува Симеон за ,,Фокус”.

Инаку Есма Реџепова почина на Скопје, 11 декември 2016 а беше една од најпознатите македонска пејачка и хуманитарка. Таа го носеше епитетот Кралица на Ромската музика во светски рамки. Во 2013 г. ја доби престижната титула Национален уметник на Република Македонија.