Министерот за здравство Венко Филипче изјави дека од утре ќе се скенираат со термална камера патниците од летовите од Дубаи и Истанбул, кои имаат конекција со регионот Вухан во Кина, од каде што почна да се шири коронавирусот, од кој досега се починати 56 лица.

Филипче рече дека нема простор за паника и дека Македонија нема директни летови со овој регион во Кина што значи дека луѓето кои евентуално би дошле од таму се веќе неколку пати скенирани на другите аеродроми.

Тој потенцира дека веќе од утре за летовите кои што имаат врска со овој регион од Кина, како летовите од Дубаи и Истанбул, патниците ќе се скенираат со термална камера.

Станува збор за вирус кој што дава многу слични симптоми на грипот. Може да помине со лесна, средна форма, но има и тешки форми кои што веќе предизвикаа смрт кај пациенти заболени од овој вирус. Морам да потенцирам дека тоа се пациенти кои се постари, со намален имунитет, и пациенти со хронични заболувања. Во однос на пристигнување на вирусот преку роба, епидемиолозите сметаат дека тоа е практично невозможно, но ние ќе преземеме мерки на превенција.

Веќе од утре за летовите кои што имаат врска со овој регион од Кина, како летовите од Дубаи и Истанбул, патниците ќе се скенираат со термална камера. Нашиот аеродром, според последните евалуации, е на највисоко ниво за детекција и рано препознавање и рана изолација доколку кај потенцијалните заразени се најдат вакви симптоми.

Ќе бидат активирани и лекарски екипи кои ќе прават прегледи, но со оглед на тоа што е сезона на грипови се очекуваат и лажни позитивни резултати“, изјави Филипче по состанокот на Комисијата за заразни болести.