„Заборавив веќе не е оправдување. Заборавањето на основните мерки за заштита може да биде фатално. Не забораваш клучеви, телефон и пари? Не заборавај маска, дезинфекција и да држиш дистанца. Едноставно е”, ова е пораката која утрово до граѓаните преку својот Фејсбук профил ја упати министерот за здравство Венко Филипче.

Три нови мерки за заштита од ковид-19 ќе ѝ предложи министерот за здравство Венко Филипче на Владата, по препорака на Комисијата за заразни болести.

Првата мерка, како што соопшти Филипче на денешната прес-конференција, предвидува забрана за масовни семејни собирања. Едно семејство ќе може да прими најмногу четворица гости.

Втората мерка е забрана за групирање на повеќе од четири лица на отворен и во затворен простор, по 22 часот.

Третата мерка предвидува носење заштитна маска или покривка на лицето и при престој на отворено, дури и кога лицето се движи само, како и во затворени простории. Исклучок, кога не мора да се покриваат устата и носот, е при спортување, за деца до шест години, при транспорт во приватно возило со членови на семејството, при седење во угостителски објекти (со почитување на протоколите), како и ако лицето е само во канцеларија.