Еврокомесарот Јоханес Хан не сака одново да ги подгрева надежите дека е можно Европската унија наскоро да донесе одлука за почеток на пристапни преговори со Македонија и со Албанија.

Во разговор со новинарот од „360 Степени“ Хан вели дека факт е дека до Самитот во Загреб во мај работите мора да бидат расчистени, но не би сакал да шпекулира за можноста за донесување на одлука за датум за преговори.

–Беше интересно и за оние што беа критични и ставија вето, да ја видат меѓународната реакција, која беше јасна и едногласна реакција – сите рекоа дека станува збор за огромна грешка со далекусежни последици, ако не се промени. Секако, за политичарите не е секогаш лесно веднаш да го променат мислењето, но мислам дека се предизвикаа одредени рефлексии и ние сме подготвени да помогнеме и да најдеме решение зашто огромен дел од земјите-членки, поточно најмалку 25, се за „зелено светло“ за почеток на пристапни преговори – вели Хан.

На прашањето што може да се очекува од претстојниот состанок на Советот за општи работи на ЕУ закажан на 19 ноември и ако се земе в предвид дека Италија вели дека притиска и дека ќе има вонредна дебата за прашањето за проширувањето, Хан рече дека не е сосема сигурен дека ќе биде баш така.

–Знам дека има одредени дипломатски обиди, но има и одредени земји-членки кои мислат дека ова би било преурането. Добро е што прашањето останува на агендата, што за него се дебатира, што има состаноци меѓу амбасадорите во Брисел, но и во Европскиот парламент и што оваа тема се „држи во живот“ што значи дека треба да најдеме решение пред Самитот за Западен Балкан во Загреб – истакна Хан.

Целиот текст можете да го прочитате ТУКА.