Двајца сопружници се мртви, а нивната 9-годишна ќерка тешко повредена откако вчера по 13 часот со нивниот автомобил излетале од патот во близина на Ријека, Хрватска.

Како што јавуваат локалните медиуми, од се уште неутврдени причини, 43-годишнио возач на автомобилот марка Шкода прешол во спротивната насока на движење при што, со кочење повторно се вратил во својата лента, излетал од коловозот и удрил во дрво.

Истрагата треба да покаже што го натерало возачот да смени правец на движење и зошто толку силно кочел.

Веста за сообраќајката која остави сираче едно 9 годишно девојче го потресе регионот.

Иако се здобила со тешки повреди, 9-годишната Лора е надвор од животна опасност, а медиумите пишуваат дека сведочела за смртта на нејзините родители додека со нивните безживотни тела ги чекала пожарникарите да ја извадат од возилото бидејќи уништениот лим ја приклештил нејзината нога.