Секој дваесетти дарител на крв во Милано развил антитела на„Ковид-19“ пред првиот официјален позитивен случај во Италија кон крајот на февруари, според студијата на поликлиниката во главниот град на Ломбардија.

Анализата на поликлиниката во Милано потврди дека вирусот циркулирал во Италија пред 21 февруари, кога бил утврден првиот официјален случај во Кодоњо.

Студијата, во која беа вклучени 800 крводарители, објавена на веб-страницата medRxiv, укажува на тоа дека на почетокот на епидемијата, 4,6 проценти од дарителите на крв веќе имале антитела на вирусот „Ковид-19“, а тој процент се искачил на 7,1 процент на почетокот на април. 

Студијата е дизајнирана и спроведена од експерти од Одделот за трансфузија на поликлиниката во Милано во соработка со Универзитетот во Милано и неколку други истражувачи од здравствени установи во главниот град на Ломбардија, најтешко погодениот регион од вирусот „Ковид-19“ во Италија.

Зачуваните примероци на крв биле користени за да се утврди присуство на антитела, не затоа што вирусот се пренесува преку крвта.

Истражувањето открило дека први што се заразиле главно биле млади луѓе и дека најголемиот број на случаи биле поврзани со постарите лица.

Со повеќе од 32.000 смртни случаи од ефектите на вирусот „Ковид-19“ од почетокот на кризата, Италија е трета во светот по бројот на жртви, по Соединетите држави и Велика Британија.

Вирусот „Ковид-19“ ја предизвика најдолгата блокада во Италија, од каде, по повеќе од два месеци, земјата постепено излегува, соочувајќи се со сериозни економски последици.